Covic-19 ဆိုတဲ့ ကပ်ရောဂါကြီး ရောက်လာကတည်းက နေ့စ္စဓူဝ လူတိုင်းဟာ အိမ်ထဲမှာပဲ နေ့ရက်တွေကို ဖြတ်သန်းနေထိုင်ကြရတာဖြစ်လို့ စိတ်ညစ်တာတွေ၊ မွန်းကျပ်မှုတွေနဲ့ မသေချာမရေရာ မှုတွေကို အနည်းအများဆိုသလို ခံစားနေကြရတာ မလွဲမသွေပါပဲ။ ဒါပေမယ့် လူသားတွေဟာ ဘယ်လိုအခက်အခဲ အကျပ်အတည်းမျိုးကို မဆို ကြံကြံခံရင်ဆိုင်ကျော်လွှား အောင်မြင်ခဲ့ကြတဲ့ သာဓကများစွာ ဒီကမ္ဘာမှာ ရှိခဲ့ပြီးဖြစ်ပါတယ်။ ဒီကပ်ရောဂါကြီးရဲ့ လွှမ်းမိုးမှုကနေ မကြာခင်မှာ လူသားအားလုံး လွတ်မြောက်မယ် ဆိုတာလည်း ရာနှုန်းပြည့် ယုံကြည်ပါတယ်။ အခုလိုအချိန်ကာလမှာတော့ တစ်ဦးတစ်ယောက်ချင်းစီတိုင်း အောက်ပါ အကြံပြုချက်များအတိုင်း လိုက်နာကာ ကျန်းကျန်းမာမာ နဲ့ အကောင်းမြင်စိတ်ထားပြီး နေ့ရက်တိုင်းကို ဖြတ်သန်းကြဖို့ Y-Max College Page မှတိုက်တွန်းနှိုးဆော်လိုက်ပါရစေ။
1.24/7 social media ပေါ်က negative impact ရစေမယ့် သတင်းတွေထဲမှာ အချိန်မကုန်ပါစေနဲ့။
ယုံကြည်စိတ်ချရတဲ့ သတင်းရင်းမြစ်ရှိရာ page မှ သတင်းများကိုသာ စောင့်ကြည့်ပြီး လိုအပ်သည့် ညွှန်ကြားချက်များအတိုင်း လိုက်နာ နေထိုင်ကြပါ။ social media အနေနဲ့ မြန်မာပြည်မှာ အများစု အသုံးများကြတဲ့ Facebook ပေါ်မှာ တနေကုန် မနေပါနဲ့။ မိမိကိုယ်မိမိ တနေ့တာ ဖုန်း / Facebook အသုံးပြုချိန်ကို ကန့်သတ်ပါ။
2. အကောင်းမြင်စိတ် မွေးပါ။
လူတိုင်းလက်ထဲမှာ ဖုန်းတွေရှိနေတဲ့ခေတ်ဖြစ်လို့ လူတွေဟာ ဒီလို အချိန်မှာ အများစုက Social Media ကိုပဲ အာရုံစိုက်နေကြတာဖြစ်ပါတယ်။ ဒါကြောင့် သတင်းအမှားတွေ၊ လူတွေကို စိုးရိမ်သောက ဖြစ်စေတဲ့ အချက်အလက်အလွဲတွေ၊ စိတ်ညစ်ညူး စရာတွေ နဲ့ချည်း မိမိစိတ်ကို အကြောက်လွန်၊ဘောင်ခတ်မထားမိဖို့ အရေးကြီးပါတယ်။ ဒီအချိန်မှာ မိမိစိတ်ကို ပျော်အောင်နေဖို့ အရေးကြီးပါတယ်။ မိမိကြောင့် တပါးသူ စိတ်သက်သာရာ ရစေမယ့် ၊ ပျော်သွားစေမယ့် အကြောင်းအရာတွေ မျှဝေပါ။ အကောင်းမြင်စိတ်ဖြင့် ကောင်းသောအရာတွေ ဖြစ်လာဖို့ကိုပဲ ဦးတည်လုပ်ဆောင်ကြပါ။
3.တေးသီချင်းတွေနားထောင်ပါ။
ဂီတဟာ လူတွေရဲ့စိတ်ကို ပေါ့ပါးလတ်ဆတ်စေပါတယ်။ ဒါကြောင့် စိတ်ညစ်စရာ အကြောင်းအရာတွေ တွေးနေမယ့်အစား ကိုယ်ကြိုက်တဲ့ တေးသီချင်းတွေကို သက်တောင့်သက်သာ စီးမျော နားထောင်ပါ။
4.ဘာသာစကားဖြစ်စေ၊ ပညာရပ်တစ်ခုခု ဖြစ်စေ online မှ လေ့လာသင်ယူပါ။
ကျောင်းတွေပြန်ဖွင့်တဲ့အခါ၊ လုပ်ငန်းခွင်ပြန်ရောက်တဲ့အခါ ကိုယ့်ရဲ့ career ကို အထောက်အကူဖြစ်ပြီး ကိုယ်လည်း ဝါသနာပါတဲ့ ပညာတစ်ရပ်ရပ်ကို လေ့လာ ဆည်းပူးသင်ယူထားရမဲ့ အချိန်ကာလပဲ ဖြစ်ပါတယ်။ YouTube မှာဖြစ်စေ၊ Google မှာဖြစ်စေ၊ Free self study လေ့လာနိုင်တဲ့ TEDx လို ၊ BBC learning English လို ဘာသာစကား လေ့လာနိုင်တဲ့ page တွေ၊   နောက်ပြီး online programs များစွာ ရှိရာ website တွေ ဖြစ်တဲ့ Coursera တို့လို edX တို့လို Beelinguapp တို့လို website တွေမှာ ဝင်ရောက်လေ့လာ ဖတ်ရှု သင်ယူလိုက်ပါ။
5.မိမိရဲ့ မိတ်ဆွေ၊သူငယ်ချင်းတွေ အပြင်ပတ်ဝန်းကျင်နဲ့ အဆက်အသွယ် ဖြတ်မထားပါနဲ့။
မိမိအိမ်မှာ အတူနေ မိဘ တွေ၊ ညီအကို မောင်နှမတွေနဲ့ ချစ်ချစ်ခင်ခင် နွေးနွေးထွေးထွေးနေထိုင်ပါ။ ဒါ့အပြင် မိတ်ဆွေ၊ သူငယ်ချင်းများနဲ့ ဖုန်းအဆက်အသွယ် လုပ်ပြီး မကြာခဏ စကားပြောပါ။ အဲ့ဒီလို ချိတ်ဆက်နေထိုင်ခြင်းဟာ ခုလို အချိန်မှာ နှစ်ဦးနှစ်ဘက်လုံးအတွက် ကြည်နူးစရာ ၊ စိတ်သက်သာရာ ရစရာ တွေကို ဖန်တီး ပေးနိုင်ပါတယ်။
6.စာဖတ်ပါ။ မိမိအသိစိတ်ကို ထိန်းချုပ်နိုင်ဖို့ တရားထိုင်ပါ။
အခုလိုအချိန်မှာ ဗဟုသုတရစေပြီး၊ ဘဝအတွက် အကျိုးရှိစေမယ့် စာအုပ်စာပေတွေ ဖတ်ရှုသင့်ပါတယ်။ နောက်ပြီး မလိုလားအပ်တဲ့ စိတ်ဖိစီးမှုတွေနည်းနိုင်သမျှ နည်းအောင်၊ မသိစိတ်ရဲ့ အတွေးတွေ ခံစားမှုတွေ ကို အကောင်းဆုံး ထိန်းချုပ်လာနိုင်အောင် ငြိမ်သက်စွာ တရားထိုင်ခြင်း ကိုလည်း ပြုသင့်ပါတယ်။
7.ကျန်းမာရေးဝန်ကြီးဌာနမှ တရားဝင်ထုတ်ပြန်လျှက်ရှိတဲ့ လမ်းညွှန်ချက်တွေအတိုင်း လိုက်နာပြီး ကိုယ်ခံအားကောင်းအောင် စားသောက်နေထိုင်ပါ။
လက်ကို ဆပ်ပြာဖြင့် မကြာခဏ ဆေးကြောခြင်း၊ တကိုယ်ရည်သန့်ရှင်းစွာ နေထိုင်ခြင်း၊ ကိုယ်လက်လှုပ်ရှားမှု မှန်မှန်ပြုလုပ်ခြင်း ၊ အိပ်ရေးဝအောင်အိပ်ခြင်း နှင့် ကိုယ်ခံအား ကောင်းစေမည့် အစားအစာများကို သင့်တင့်မျှတစွာ စားသုံး ပေးကြပါလို့ တိုက်တွန်း နှိုးဆော်လိုက်ရပါတယ်။
မြန်မာပြည်သူပြည်သားများအားလုံး လူစုလူဝေးကို တတ်နိုင်သမျှ ရှောင်ရှားကာ၊ မိမိတို့ နေအိမ်များအတွင်းမှာပင် နေထိုင်ကြပါရန်လည်း တိုက်တွန်းနှိုးဆော်လိုက်ပါသည်။ လူတိုင်းလူတိုင်း ကျန်းမာရေးအသိနှင့် သတိအမြဲရှိကာ ကပ်ရောဂါဆိုး အန္တရာယ်ကူးစက်ခြင်းမှ ကာကွယ်နိုင်ပြီး၊ မြန်မာနှစ်သစ်အခါသမယမှာ ကိုယ်၊စိတ်နှစ်ပါး ကျန်းမာချမ်းသာ ကြပါစေကြောင်း Y-Max မိသားစုမှ နှစ်သစ်ဆုမွန်ကောင်းတောင်းလိုက်ပါတယ်။